Lënda Nr. IT-03-66-PT
Prokurorja kundër Isak Musliut

VENDIM

SEKRETARI,

DUKE MARRË PARASYSH Statutin e Tribunalit të miratuar nga Këshilli i Sigurimit me Rezolutën 827 (1993), dhe në veçanti Nenin 21 të tij;

DUKE MARRË PARASYSH Rregulloren e Procedurës dhe të Provave të miratuar nga Tribunali më 11 shkurt 1994, me ndryshime të mëvonshme, dhe në veçanti Rregullat 44 dhe 45 të saj;

DUKE MARRË PARASYSH se në letra me data 22 dhe 27 gusht 2000 respektivisht,i akuzuari Isak Musliu (më tej "i akuzuari") kërkoi nga Sekretari që ta heqë nga detyra si avokat kryesor Zotin Bajram Krasniqi, avokat nga Prishtina, për këto arsye:

- Z. Krasniqi i premtoi të akuzuarit se do të merrte përsiper disa detyra kyçe për përgatitjen e dosjes për mbrojtjen, por në fakt nuk i mbaroi këto detyra;

- I akuzuari nuk ka mundur ta kontaktonte Z. Krasniqin për një kohë mjaft të gjatë për të diskutuar shqetësimet e tij; dhe

- Z. Krasniqi ka qenë i pakujdesshëm në mënyrën në të cilën ai ka kryer detyrat e tij si avokat dhe prandaj i akuzuari dëshiron që ta zëvendësojë menjëherë për të parandaluar vonesa në të ardhmen ose paragjykimin e çështjes së tij.

DUKE MARRË PARASYSH se Sekretari u përpoq të kontaktonte Z. Krasniqi disa herë për t'u njoftuar për qëndrimin e tij ndaj ankesave të të akuzuarit, pa sukses;

DUKE MARRË PARASYSH se Sekretari, në një letër të datës 3 shtator 2003, kërkoi që Z. Krasniqi të paraqiste urgjentisht përgjigjen e tij ndaj këtyre ankesave, dhe nuk është marrë asnjë përgjigje deri tani;

DUKE SHËNUAR se e drejta e të akuzuarit për të zgjedhur avokatin e tij, e parashikuar në Nenin 21 të Statutit, nuk është absolute dhe duhet të ushtrohet brenda kufijve të sistemit të ndihmës juridike të zbatuar nga Tribunali;

DUKE SHËNUAR MË TEJ se e drejta e të akuzuarit për të zgjedhur avokatin e tij nuk barazohet me të drejtën për të hequr avokatin e zgjedhur dhe se Sekretari ka të drejtën legjitime për të marrë parasysh paragjykimin që mund t'i shkaktohet të akuzuarit, mundësine e vonesave dhe shpenzimet eventuale që do të rridhinin nga zëvendësimin e avokatit në atë fazë të procedurave;

DUKE MARRË PARASYSH se i akuzuari e kërkoi caktimin e Zotit Krasniqi si avokati kryesor i tij më 25 mars 2003;

DUKE MARRË PARASYSH se Z. Krasniqi nuk figuronte në listën e avokatëve, sipas Rregullës 45, të cilët mund të konsiderohen për caktim si avokatë mbrojtës, meqenëse ai nuk flet asnjërën nga gjuhët e punës të Tribunalit;

DUKE MARRË PARASYSH se sidoqoftë Rregulla 44(B) parashikon se, me kërkesën e të akuzuarit, në interes të drejtësisë, Sekretari mund të caktojë një avokat i cili nuk flet asnjërën nga gjuhët e punës, dhe mund të vendosë kushtet që duken të përshtatshme;

DUKE MARRË PARASYSH se më 23 prill 2003, Z. Krasniqi u pranua si anëtar i Shoqatës së Avokatëve Mbrojtës meqenëse ai kishte përvojën e domosdoshme;

DUKE MARRË PARASYSH se më 29 prill 2003, në baze të Rregullës 44(b), Sekretari nuk mori parasysh kërkesën e gjuhës dhe ia caktoi të akuzuarit Zotin Krasniqi si avokat kryesor në interes të drejtësisë, duke besuar se ai kishte përvojë të mjaftueshme në fushën juridike të kriminalistikës për ta përfaqësuar të akuzuarin në një mënyrë që përputhet me standartet e përfaqesimit profesional të parashtruara në Kodin e Sjelljes;

DUKE MARRË PARASYSH se nga ankesat e të akuzuarit duket se Z. Krasniqi nuk është konsultuar në mënyrë të mjaftueshme me klientin etij, si kerkohet nga Neni 8(B)(ii) i Kodit të Sjelljes, dhe nuk i përmbush standartet e kompetencës dhe aftësisë që kërkohen nga Neni 10(i) i Kodit të Sjelljes;

DUKE MARRË PARASYSH se, edhe pse Sekretaria nuk ka mundur të njoftohej për qëndrimin e Zotit Krasniqi ndaj ankesave të të akuzuarit, Sekretaria ka vërtetuar se ankesat e të akuzuarit janë të besueshme.

DUKE MARRË PARASYSH se Neni 19(E) i Direktivës parashikon se, me heqjen e avokatit, Sekretari menjëherë i cakton të akuzuarit një avokat të ri;

DUKE SHËNUAR se Sekretaria ka ndër mend të mundësojë intervista me avokatë të mundshëm për t'u siguruar se i akuzuari ka besim të plotë në kandidatin të cilin ai ka ndër mend të emërojë për detyrën si avokat kryesor;

DUKE SHËNUAR se, edhe pse më parë Sekretaria nuk mori parasysh kërkesën e gjuhës në interes të drejtësisë për Zotin Krasniqi, duke marrë parasysh fazën e vonshme të procedurave dhe faktin se Z. Krasniqi nuk i ka mbaruar detyrat që iu caktuan si avokat kryesor, avokati zëvendësues duhet të ketë mjaft përvojë në të drejtën ndërkombëtare/kriminale dhe procedurat kriminale dhe duhet të zotërojë njërën nga gjuhët e punës të Tribunalit, për të shmangur vonesa;

DUKE SHËNUAR se, në përputhje me Nenin 9(D) të Kodit të Sjelljes, Zoti Krasniqi detyrohet të dorëzojë të gjitha dokumentet dhe sendet të cilat i përkasin klientit ose Tribunalit;

DUKE SHËNUAR se në përputhje me Nenin 13(A) të Kodit të Sjelljes, Z. Krasniqi vazhdon t'i nënshtrohet detyrës së fshehtësisë;

ME KËTË RAST VENDOS që ta heqë nga detyra Zotin Bajram Krasniqi, avokat nga Prishtina, me efekt nga data e këtij vendimi.

Hans Holthuis
Sekretari
/nënshkruar/

Sot me datën tetë shtator 2003
Në Hagë
Holandë.

/vula e Tribunalit/