Lënda Nr. IT-03-66-PT
Prokurorja kundër Haradin Balës

VENDIM

ZËVENDËSSEKRETARI,

DUKE MARRË PARASYSH Statutin e Tribunalit të miratuar nga Këshilli i Sigurimit me anë të Rezolutës 827 (1993), dhe në veçanti Nenin 21 të tij;

DUKE MARRË PARASYSH Rregulloren e Procedurës dhe të Provave (më tej: "Rregullorja") të miratuar nga Tribunali më 11 shkurt 1994, me ndryshime të mëvonshme, dhe në veçanti Rregullat 44 dhe 45 të saj;

DUKE MARRË PARASYSH Direktivën për Caktimin e Avokatëve Mbrojtës (më tej: "Direktiva") të miratuar nga Tribunali më 28 korrik 1994, me ndryshime të mëvonshme, dhe në veçanti Nenet 8, 9, 10, 11 (A) (i) dhe 19 (A) (i) të saj;

DUKE MARRË PARASYSH kërkesën e Zotit Haradin Bala (më tej: "i akuzuari") të datës 12 mars 2003 që kërkon caktimin e Zotit Tomë Gashi, avokat nga Prishtina, si avokatin e tij kryesor dhe caktimin e Zotit Peter Murphy, avokat nga Hjustoni, si bashkavokat;

DUKE MARRË NË SHËNIM vendimin e Sekretarit të datës 9 maj 2003 i cili caktoi Zotin Tomë Gashi si avokat kryesor i të akuzuarit dhe Zotin Peter Murphy si bashkavokat i të akuzuarit për një periudhë prej 120 ditëve, duke pritur verifikimin e gjendjes financiare të të akuzuarit;

DUKE MARRË NË SHËNIM letrën e të Akuzuarit të datës 17 nëntor 2003, në të cilën i Akuzuari shprehu pakënaqësi të përgjithshme me mënyrën në të cilën Zoti Gashi e kryen mbrojtjen dhe i ka paraqitur Sekretarit disa vërejtje në përkrahje të kërkesës së tij për tërheqjen e Zotit Gashi si avokat kryesor;

DUKE MARRË NË SHËNIM se më vonë në të njëjtën letër, i Akuzuari kërkoi nga Sekretaria që të caktohet Zoti Murphy, aktualisht bashkavokat, si avokati i tij kryesor;

DUKE MARRË PARASYSH se Zoti Gashi e kishte informuar Sekretarinë, në një leter të datës 8 dhjetor 2003, për mosmarrëveshje me klientin e tij për mënyrën në të cilën mbrojtja duhet kryer dhe se edhe ai pranoi që të tërhiqej nga ekipi mbrojtës i të Akuzuarit;

DUKE MARRË PARASYSH se Zoti Murphy ka shprehur pëlqimin e tij që të cakohet si avokati kryesor i të Akuzuarit;

DUKE MARRË PARASYSH se zëvendësimi i Zotit Gashi si avokat kryesor nga Zoti Murphy, në fazën e tanishme të procedurave, nuk do të dëmtonte përfaqësimin e të Akuzuarit, as nuk do të vononte në mënyrë të dukshme procedurat paragjyqësore;

DUKE MARRË PARASYSH se i Akuzuari është informuar se Sekretaria nuk do të akordojë mjete financiare plotësuese si rezultat i zëvendësimit të avokatit kryesor;

DUKE VENDOSUR se arsyet e parashtruar nga i Akuzuari dhe Zoti Gashi e bindin plotësisht Zëvensëssekretarin se kjo do të ishte një tërheqje e avokatit "në interesat e drejtësisë" sipas Nenit 19 (A) (i);

DUKE MARRË NË SHËNIM se në përputhje ne Nenin 9(D) të Kodit të Sjelljes, Zoti Gashi detyrohet të dorëzojë të gjitha dokumentet dhe gjësendet për të cilat klienti dhe/ose Tribunali ka të drejtë;

DUKE MARRË NË SHËNIM se në përputhje me Nenin 13 (A) të Kodit të Sjelljes, Zoti Gashi vazhdon t'i nënshtrohet detyrës së fshehtësisë;

DUKE MARRË PARASYSH se, gjatë kërkimeve të saj në bazë të Nenit 10 të Direktivës, Sekretaria ka marrë dokumente që konfirmojnë se të Akuzuarit nuk i dalin mjetet financiare për të paguar shpenzimet e mbrojtjes.

ME KËTË VENDOSI të tërheqë caktimin e Zotit Tomë Gashi si avokat kryesor dhe të caktojë Zotin Peter Murphy zi avokat kryesor për të Akuzuarin, me efekt nga data e këtij vendimi.

/nënshkruar/
David Tolbert
Zëvendëssekretar

/vula e Tribunalit/

Sot më datën njëmbëdhjetë dhjetor 2003
Në Hagë
Holandë.