Lënda Nr. IT-03-66-PT
Prokurorja kundër Isak Musliut

VENDIM

ZËVENDËSSEKRETARI

DUKE MARRË PARASYSH Statutin e Tribunalit të miratuar prej Këshillit të Sigurimit me Rezolutën 827 (1993), dhe në veçanti Nenin 21 të tij;

DUKE MARRË PARASYSH Rregulloren e Procedurës dhe të Provave (më tej "Rregullorja") të miratuar prej Tribunalit më 11 shkurt 1994, me ndryshimet e mëvonshme, dhe në veçanti Rregullat 44 dhe 45 të saj;

DUKE MARRË PARASYSH Direktivën për Emërimin e Avokatëve Mbrojtës (më tej "Direktiva") e miratuar prej Tribunalit më 28 korrik 1994 dhe me ndryshime të mëvonshme, dhe në veçanti Nenet 8, 9, 10 dhe 11 (A)(i) të saj;

DUKE MARRË PARASYSH Kodin e Sjelljes Profesionale për Avokatët para Tribunalit Ndërkombëtar (IT/125 REV.1) (më tej "Kodi i Sjelljes");

DUKE MARRË PARASYSH se më 29 prill 2003, me kërkesë të të akuzuarit, Z. Isak Musliu (më tej "i akuzuari"), Sekretari caktoi Z. Bajram Krasniqi, avokat nga Prishtina si Avokat Kryesor për të akuzuarin dhe Z. Steven Powles, avokat nga Londra, si bashkavokat për të akuzuarin për një afat prej 120 ditësh deri në vlerësimin e mundësive financiare të të akuzuarit për të paguar avokatin;

DUKE MARRË PARASYSH se në bazë të deklararatës financiare të të akuzuarit dhe dokumentacionit të paraqitur në mbështetje të saj, Sekretaria ka përcaktuar se i akuzuari nuk është në gjendje të paguajë avokatin dhe si rrjedhim ka të drejtë të përfitojë ndihmë juridike;

DUKE MARRË PARASYSH më tej se në letërkëmbimin e datave 22 dhe 27 gusht 2003, i akuzuari kërkoi prej Sekretarisë që të hiqte Z. Krasniqi nga detyra për shkak se po e kryente mbrojtjen në mënyrë të pakujdesshme dhe joprofesionale;

DUKE MARRË SHËNIM vendimin e Sekretarit të datës 6 shtator 2003, për heqjen nga detyra si avokat kryesor të Z. Krasniqi për arsyet e lartpërmendura;

DUKE MARRË PARASYSH se më 19 shtator 2003, i akuzuari kërkoi emërimin e një juristi që doli se ishte i pakualifikuar për të përfaqësuar të akuzuarin dhe si pasojë emërimi i tij u refuzua prej Sekretarisë;

DUKE MARRË SHËNIM letërkëmbimin e mëvonshëm midis Sekretarisë dhe të akuzuarit ku i akuzuari u këshillua që të zgjidhte një avokat të ri nga lista e avokatëve në dispozicion të të akuzuarve pa mjete financiare në bazë të Rregullës 45;

DUKE MARRË PARASYSH se më 14 maj 2004, i akuzuari kërkoi që Z. Michael Topolski, avokat nga Londra, të emërohet avokat kryesor;

DUKE MARRË PARASYSH se në të njëjtën letër, i akuzuari shprehu dëshirën që Z. Powles të vazhdojë të punojë për mbrojtjen e tij si bashkavokat;

DUKE MARRË PARASYSH se Z. Topolski aktualisht nuk është i përfshirë në listën e avokatëve të Rregullës 45, por është i gatshëm që emri i tij të shtohet në këtë listë;

DUKE MARRË PARASYSH se Z. Topolski e ka anglishten gjuhë amtare dhe është avokat mbrojtës me përvojë, dhe se është bërë anëtar i Shoqatës së Avokatëve Mbrojtës;

DUKE MARRË PARASYSH se si rrjedhim Sekretaria është e bindur se Z. Topolski i përmbush kërkesat e kualifikimit të Rregullores dhe të Direktivës për pranim në listën e Rregullës 45 dhe për të përfaqësuar të akuzuar pa mjete financiare;

DUKE MARRË PARASYSH se Z. Topolski ka shprehur pëlqimin për emërimin e tij si avokat kryesor i të akuzuarit;

DUKE MARRË PARASYSH se e drejta e të akuzuarit për përfaqësim ligjor nuk u dëmtua në asnjë rast meqenëse Z. Powles vazhdoi të përfaqësonte të akuzuarin, si ushtrues i detyrës së avokatit kryesor, nga dita e tërheqjes së Z. Krasniqi deri në datën e këtij vendimi;

ME KËTË VENDOS pa paragjykuar nenin 18 të Direktivës, të emërojë Z. Michael Topolski si avokat kryesor për të akuzuarin dhe të konfirmojë emërimin e Z. Steven Powles si bashkavokat që nga data e këtij vendimi