PARA DHOMËS SË GJYQIT

Para:

Gjykatësit Alphons Orie, kryesues
Gjykatësit Amin El Mahdi
Gjykatësit Martín Canivell

Sekretari: Z. Hans Holthuis

Vendim i datës: 25 shkurt 2004

PROKURORJA
kundër
FATMIR LIMAJT
HARADIN BALËS
ISAK MUSLIUT

Zyra e Prokurorit:
Zoti Andrew Cayley
Zoti Alex Whiting

Avokatët mbrojtës:
Zoti Michael Mansfield për Fatmir Limajn
Zoti Peter Murphy për Haradin Balën
Zoti Steven Powles për Isak Musliun

DHOMA E GJYQIT I, Seksioni B ('Dhoma e Gjyqit') e Tribunalit Ndërkombëtar për Ndjekjen Penale e Personave Përgjegjës për Shkelje të Rënda të së Drejtës Humanitare Ndërkombëtare të Kryera në ish-Jugosllavi prej Vitit 1991 ('Tribunali');

DUKE U MARRË me 'Kërkesën për Verifikim prej Dhomës së Gjyqit për ta Apeluar Vendimin për Mocionin e Prokurorisë për të Ndryshuar Aktakuzën e Ndryshuar' të paraqitur nga Mbrojtja e Isak Musliut në bazë të Rregullës 73 (B) më datën 20 shkurt 2004 ('Kërkesa për Verifikim');

DUKE MARRË NË SHËNIM 'Përgjigjen e Prokurorisë ndaj Kërkesës së të Akuzuarit Musliu për Verifikim prej Dhomës së Gjyqit për ta Apeluar Vendimin për Mocionin e Prokurorisë për të Ndryshuar Aktakuzën e Ndryshuar' të paraqitur më 24 shkurt 2004, në të cilën Prokuroria në përgjithësi argumenton se i Akuzuari Musliu nuk ka ngritur 'ndonjë argument të ri i cili nuk është marrë parasysh nga Dhoma e Gjyqit në mënyrë të plotë dhe të drejtë';^[1]

DUKE MARRË NË SHËNIM vendimin e Dhomës së Gjyqit të dhënë më 13 shkurt 2003, duke i dhënë leje Prokurorisë për të ndryshuar Aktakuzën e Ndryshuar ('Vendimi i Kontestuar');

DUKE MARRË PARASYSH se në bazë të Rregullës 73(B), Dhoma e Gjyqit mund të verifikojë se një apel i ndërkohshëm mund të paraqitet kundër një vendimi që ka të bëjë me një çështje qe do të ndikojë kryerjen e drejtë dhe të shpejtë të procedurave ose rezultatin e gjyqit, dhe për të cilën, sipas mendimit të Dhomës së Gjyqit, një zgjidhje e menjëhershme prej Dhomës së Apelit mund të çojë përpara procedurat në mënyrë të dukshme;

DUKE MARRË PARASYSH se Mbrojtja e Isak Musliut deklaron se Dhoma e Gjyqit gaboi duke i dhënë leje Prokurorisë për të ndryshuar Aktakuzën e Ndryshuar kundër Isak Musliut sepse Vendimi i Kontestuar ' do të ndikojë per të keq kryerjen e drejtë dhe të shpejtë të procedurave dhe një zgjidhje e menjëhershme prej Dhomës së Apelit do të çojë përpara procedurat në mënyrë të dukshme';^[2]

DUKE VLERËSUAR SE Vendimi i Kontestuar nuk përfshin ndonjë çështje 'që do të ndikonte në mënyrë të dukshme kryerjen e drejtë dhe të shpejtë të procedurave ose rezultatin e gjyqit dhe as per të cilën, sipas mendimit të Dhomës së Gjyqit, një zgjidhje e menjëhershme prej Dhomës së Apelit do të çonte përpara procedurat në mënyrë të dukshme; dhe se për këtë arsye një apel i ndërkohshëm kundër Vendimit të Kontestuar nuk është me vend;

NË BAZË TË Rregullës 73(B);

ME KËTË E REFUZON Kërkesën për Verifikim.

Bërë në anglisht dhe frengjisht; versioni në anglisht ka përparësi.

Sot, me datën njëzetepestë shkurt 2004.
Në Hagë
Holandë

^[1] Përgjigja e Prokurorisë, para 1

^[2] Kërkesa për Verifikimin e Lejes, para 4.